Запуштениот простор под Железничката станица,
во близина на Транспортниот центар, на делот
помеѓу Пошта 1 и кејот на реката Вардар, ќе се
претвори во модерен Парк за урбани спортови,
кој му недостасуваше на градот Скопје и на скопјани.
Со овој проект, не само што ќе се артикулира
и оплемени овој простор, кој досега претставуваше
дива депонија, туку планираните богати содржини
ќе го задоволат вкусот на младите, како и на
вљубениците во урбаните спортови.
Во поглед на барањата, содржините, локацијата
и изгледот на Паркот за урбани спортови од самиот
почеток на идеата беа консултирани и вклучени
клубови и организации кои се занимаваат со спорт,
рекреација и со екстремни спортови.
На самиот терен веќе се работи и досега се завршени
земјените работи, а теренот е расчистен и од
шутот, кој со години бил таложен ( АДГ Пелагонија).
Завршено е и прифаќањето на атмосферските води
од горната платформа и нивното канализирање (
кои инаку се слеваа на теренот) ( АДГ Бетон).
Во моментов се работи на пристапната улица и
на паркингот.
Следува изградба на целосната подземна инфраструктура
(атмосферска и фекална канализација, водоводна
мрежа, електрично осветлување и телефонски водови).
Со проектот се предвидува простор за „Paintball “,
а за потребите на идните корисници ќе се направат
одвоени машки и женски гардероби со тушеви и
санитарии, простор за чување на реквизитите,
како и спортски кафе бар со летна тераса.
Скејт парк со приближно кавадратна асфалтирана
површина, со максимално мазна површина, како
и бетонски базен со слободна форма, променлива
длабочина и наклон на страните.
Во продолжение на Скејт паркот предвидено е поставување
на вештачка карпа, како и монтажни
и преносливи трибини за публиката.
Околу овие три елементи ќе има кружна патека
за ролери од мазен асфалт.
И во овој дел ќе има гардероби и санитарии, како
и спорт кафе со летна тераса. Овој објект ќе
биде покриен со рамна плоча – проодна тераса,
од каде што, пак, започнува Адреналин
паркот – систем составен од дрвени греди
и сајли по кои играчите ќе се движат и кој го
зафаќа просторот над Скејт паркот.
Во втората третина на паркот ќе бидат сместени
игралиштето за баскет, игралиште за одбојка,
за ракомет и за street hokey.
Третата третина од просторот функционално е предвидена
како детско катче, односно простор опремен со реквизити
за деца и игралиште за мал фудбал.
Извор: http://www.skopje.gov.mk/ 
